O mal tempo na tarde de onte non foi un impedimento para que máis dunha centena de persoas asistisen ao Auditorio municipal de Ribeira para desfrutar da posta en escena de Pum, pum!, da man de Baobab Teatro. A peza presentou a Marieta, unha nena de 5 anos rodeada de portas que se abrían para contar historias, as cales tiñan música e cantaban cando a nena quería. Pero Marieta tiña unha porta que gardaba un segredo. Un segredo que nunca contara e que ninguén escoitara. Deste xeito, Pum, pum! narrou relatos cotiás que lles pasan aos cativos destas idades.
Este espectáculo teatral, dirixido ao público infantil e familiar coa finalidade de dinamizar o uso da lingua galega e a loita pola igualdade de xénero, estivo organizado pola ANPA do CEIP Plurilingüe de Palmeira grazas a unha subvención da Secretaría Xeral de Igualdade e o Ministerio de Presidencia, Relacións coas Cortes e Igualdade. Así mesmo, contouse coa colaboración do Concello de Ribeira, o cal dispuxo do espazo municipal, técnicos e publicidade; ademais do citado centro escolar que cooperou coa cartelería e a difusión entre os proxenitores do alumnado do colexio.
A presidenta da ANPA do CEIP Plurilingüe de Palmeira, Paz González, manifestou a satisfacción da asociación pola resposta recibida por parte dos asistentes ao espectáculo, salientando a cifra acadada e a “cantidade moi homoxénea entre homes e mulleres.”