O pasado 11 de outubro inaugurábase a exposición Victoriano García Martí: unha punta de Europa, instalada na planta baixa do Museo Valle-Inclán da Pobra do Caramiñal, como parte fundamental do I Ciclo dedicado a profundar na vida e obra deste intelectual, destacándose nela o seu forte compromiso coa cultura e con Galicia. Agora, veciñanza e visitantes poderán desfrutar desta mostra durante máis tempo despois de que se decidise prorrogar a súa duración, concretamente ata o 4 de xaneiro de 2020. Así, amplíase a posibilidade de acceder á personalidade e as distintas facetas da produción literaria de García Martí (A Pobra do Caramiñal, 1881 – Madrid, 1966).
Comisariada polo investigadora Rosario Mascato Rey, a exposición reúne fotografías, publicacións e documentos persoais cuxa localización e selección foi o froito dunha estreita colaboración entre as dúas institucións culturais, especialmente a través do traballo realizado por Rosa Méndez García, bibliotecaria do Museo do Pobo Galego, e Antonio González Millán, director do Museo Valle-Inclán.
