O cómico e narrador oral Pedro Brandariz estará presente o venres 22 en dúas localizacións de Boiro. A primeira das citas terá lugar, ás 19.00 horas, na Librería Espazo Lector Nobel con Non máis princesas, un espectáculo de narración oral dirixido a público familiar e protagonizado por personaxes femininas que escapan dos estereotipos e dos roles clásicos de xénero, labrándose un futuro prometedor e, sobre todo, decidindo libremente. Trátase dunha montaxe que ten como principal obxectivo a concienciación na igualdade de xénero e a prevención das violencias machistas desde as idades máis temperás.
E a segunda das citas desenvolverase, ás 21.00 horas, na Casa da Cultura coa representación de Papar sen cancelas, da man de Culturactiva e compartindo escenario con Fran Rei e Isabel Risco.