O grupo municipal do PSdeG-PSOE ribeirense levará a pleno un rogo relativo ao estado da baranda de protección do parque infantil de Aguiño situado na esquina da rúa Castelao coa rúa do Porto.
Os socialistas manifestan que o citado espazo “pasa a ser un dos máis frecuentados polos rapaces na hora de lecer, debido á súa boa ubicación e dotación de xogos”, pero que a estrutura metálica instalada na beirarrúa “presenta evidentes signos de oxidación” e que “esta falta de mantemento do mobiliario urbán, falta de pintado das zonas de desconchado, e con óxido, pode provocar cortes e feridas nos rapaces, con risco de posibles infeccións.”
Tamén engaden que o valado de madeira na rúa Nordés “amosa a falta de barnizado.”
Por todo isto, a formación solicita que se comuniquen as “eivas na infraestrutura” ao departamento de obras do Concello, para que se proceda ao pintado das mesmas.
