Elena García Argibay, estudante de nove anos do centro de Amicos, resultou a gañadora do Cuarto Concurso de Pintura Escolar de Nadal e a súa obra servirá para ilustrar a cartelería impulsada polo Concello de Ribeira. Como novidade, haberá unha segunda creación seleccionada: trátase dun traballo de Paula Queiruga García, alumna de once anos do colexio Galaxia, que servirá para decorar a postal municipal.
Así o decidiu o xurado do certame tras escoller estas dúas obras -a primeira como gañadora, a segunda como accésit- de entre as 446 creacións procedentes de nove centros educativos que se presentaron ao concurso. Cómpre lembrar que o xurado estivo integrado por Eugenia Gómez Vidal, Pilar Ageitos Fuentes, Fernando Yáñez González, Paco Casal Castro, persoas de recoñecida traxectoria no mundo da arte, e Juana Brión Santamaría, concelleira de Educación, actuando como secretaria Alicia Padín.
Ambas ilustracións foron presentadas esta mañá na Casa do Concello pola concelleira de Cultura, María Sampedro, e a súa homóloga da área de Educación, Juana Brión. A gañadora Elena García non puido acudir ao evento, polo que asistiu Pilar Sampedro en representación de Amicos. Pola súa parte, Paula Queiruga estivo acompañada de boa parte dos seus compañeiros e compañeiras de clase e da súa familia.
Paula quixo dar as grazas aos seus amigos, pais, a súa irmán pequena e ao seu profesor por animala a facer o debuxo; mentres que Pilar Sampedro destacou que “con apoio todo o mundo pode ser artista.”
A edil María Sampedro aproveitou este acto para anunciar que o venres 29, ás 19.30 horas, coincidindo coa celebración do Black Friday e por expreso desexo da Asociación de Empresarios de Ribeira, acenderase o alumeado de Nadal do centro da cidade. Segundo a programación, comezarase por acender en primeiro lugar a praza do Concello para, seguidamente, acudir ata o Malecón para iluminar o Belén municipal alí enclavado, así como outros novidosos elementos, entre eles, unha bola con microbombillas de doce metros de altura. O evento rematará cunha chocolatada no propio Malecón. En caso de chuvia, o itinerario será ao revés: comezando ás 19.30 horas no Malecón e, a continuación, asistir á praza do Concello, onde a chocolatada terá lugar baixo os soportais do Consistorio.
Por outra banda, fóra do centro urbano, o acendido de Nadal terá lugar o 5 de decembro. Cómpre destacar que entre os máis de 400 elementos de que constará este ano o alumeado figuran algúns tan novidosos como dous ‘gobos’ (proxeccións luminosas) nas fachadas do mercado municipal e a sala museo municipal de Ribeira, tres árbores de Nadal de 18, 10 e 15 metros de altura ou a referida bola de 12 metros.
