Despois dos comicios xerais celebrados na xornada de onte, a Asociación Amicos atópase cotexando o desenvolvemento do proxecto de adaptación cognitiva dos 94 colexios e 137 mesas do partido xudicial de Noia, mediante o cal se posibilitaba que puidesen exercer o seu dereito a voto ao redor de 7.000 persoas con discapacidade intelectual censadas nesta área. A responsable do Centro de Atención Integral Amicos, Pilar Sampedro, afirmou que, aínda que se atopan facendo o restante das comprobacións necesarias sobre o proceso de adaptación, nalgúns dos concellos chegouse ao 100%. Así, sostén que, á espera do resto de datos, de non acadar a totalidade, estará en torno ao 90%.
O proxecto incluía a colocación na entrada dos colexios electorais de pictogramas informativos que indicarían as distintas mesas electorais e marcarían a actividade nas cabinas de votación, a mesa de papeletas e as propias mesas onde se votaba. Deste xeito, aportarían información sobre os horarios, a secuencia para garantir o voto secreto, a selección e introdución das papeletas nas urnas e a secuencia explicativa para exercer o voto en urna, ademais da indicación das urnas do Congreso e Senado.
Nunha visita realizada a semana pasada ao Centro de Atención Integral Amicos por parte da subdelegada do Goberno na Coruña, Pilar López-Rioboo, e a vicesecretaria da Delegación do Goberno de Galicia, Eva Vázquez, insistiuse na necesidade de continuar traballando para acadar a igualdade que establece a lei, de tal forma que tanto a Subdelegación do Goberno na Coruña coma a propia Delegación do Goberno aceptaron o reto de seguir participando activamente no proxecto posto en marcha pola Asociación Amicos, confiando en que nas próximas eleccións sexan xa o Ministerio de Interior e o Ministerio de Política Territorial os que poidan regular este proceso.
