O alcalde de Ribeira, Manuel Ruiz, e o delegado territorial de Educación da Xunta na provincia da Coruña, Indalecio Cabana, mantiveron no transcurso desta mañá sendas reunións con representantes dos colexios de Artes e Frións co obxectivo de escoitar as súas demandas en canto a melloras nas instalacións.
Así, no que respecta ao centro de educación situado na parroquia de Artes, tales peticións pasan por mellorar a envolvente térmica nas fiestras do inmoble e tamén pola dotación de chan de tarima a unha parte do recinto escolar, dúas cuestións que tanto desde o Concello coma desde Educación a súa execución se considera factible.
En canto ao colexio de Frións, unha das necesidades postas enriba da mesa foi a ampliación do comedor, para a cal existen diversas alternativas, consistindo unha delas en gañar espazo cara ao ximnasio.
Ademais, están en marcha outras melloras en centros educativos do municipio coma son as obras de rehabilitación enerxética do CEIP Plurilingüe de Palmeira, para o cal a Xunta vén de solicitar ao Concello ribeirense licenza de obras e cuxo orzamento ascende ao redor de 634.000 euros.
