Con motivo das eleccións xerais do 10 de novembro, ás 00.00 horas do venres 1 arrancou a campaña electoral. Así, integrantes do Partido Popular de Ribeira reuníronse na medianoite do venres nos soportais da praza do Concello para proceder á pegada de carteis coa imaxe de Pablo Casado como candidato á presidencia do Goberno central.
Por outra banda, o polideportivo ribeirense de A Fieiteira acolleu na tarde do sábado o mitin central da campaña. O acto contou coas intervencións do presidente do Partido Popular de Galicia, Alberto Núñez Feijóo; o presidente provincial, Diego Calvo; o rexedor de Ribeira, Manuel Ruiz; e a tenente de alcalde do municipio e candidata ao Congreso pola provincia de A Coruña, María Sampedro.
Núñez Feijóo pediu unir o voto no Partido Popular ante un PSOE que “xa non convence e só lle queda dividir para vencer.” O líder dos populares galegos manifestou que “cada voto sen escano a VOX e Ciudadanos son máis escanos para un Goberno do PSOE con populistas e nacionalistas.” Neste senso, subliñou que “no Partido Popular caben todos os que queren máis compromiso con Galicia, respecto á Constitución e á convivencia, recuperar a estabilidade e xestión e un Goberno que goberne.”
Ademais, destacou o investimento da Xunta para o vindeiro ano en educación, sanidade servizos públicos, dependencia, conciliación e, tamén, para afrontar o desequilibrio territorial e o reto demográfico. Así mesmo, fixo fincapé en que, a partir do 2020, tódalas familias galegas terán a escola infantil gratuíta para o seu segundo fillo e os sucesivos. Segundo Feijóo, “uns falan, outros facemos.”