Di quen escrebe que o outono é boa época para mergullarnos de cabeza na literatura, na filosofía, na poesía e no pensamento crítico. Xa non é que o tempo non axude moito a ter moitas máis afeccións aparte da de escribir e ler, é que entre finais de setembro e decembro a natureza semella poñerse teimuda para lanzarnos en bucle a mesma mensaxe: le, comparte, pensa, conta. O selo editorial Axóuxere e a súa residencia de escritores de Brión (Rianxo) semellan estar especialmente expostos a estes condicionantes.
Froito diso, o programa de actividades de divulgación e formación da editorial vén estes días ateigado de cousas novas. Esta mesma semana, logo dos encontros coa filósofa galega Raquel Ferrández, é a quenda de escoitar o que nos ten deparado o escritor brasileiro Henrique Komatsu, ao que seguirá a escritora libanesa Joelle Saliba.
Para quen non o saiba, Raquel, Hernrique e Joelle son residentes este outono na casa de Brión (Rianxo), ao abeiro do programa de residencias de escritoras/es e pensadoras/es que a Axóuxere organiza xunto coa Deputación da Coruña e máis o Concello de Rianxo.
Respecto das actividades máis inmediatas de Henrique Komatsu, achéganos un obradoiro de literatura, A escrita como forma de resignificar a realidade, entre o sábado 23 e o domingo 24 de novembro, na Biblioteca Pública Municipal de Rianxo e na casa de Axóuxere Editora. Amais, o escritor brasileiro engadirá ao devandito obradoiro a conferencia O ensaio e a resignificación da realidade, o venres 22 de novembro ás 20 horas na Biblioteca.
Segundo informan Axóuxere e o Concello, a participación nos obradoiros é de balde pero faise preciso inscribirse previamente. Para inscribirse hai que enviar un correo a info@axouxerestream.com co asunto “Inscrición ao obradoiro de Henrique Komatsu / Joelle Saliba”, segundo corresponda. Ou ben chamar aos teléfonos 981 860 371 / 634 532 896 / 650 843 761, 21 de novembro para o de Henrique Komatsu e 28 de novembro para o de Joelle Saliba.
Henrique Yuichi Komatsu (Brasil) foi seleccionado este ano para a residencia de Axóuxere por un proxecto de escrita poscontemporánea, na liña de autores como Lydia Davis, Donald Barthelme ou Pierre Bettencourt, que camiña nas marxes do expresábel, transitando a borda na que a linguaxe tenta falar do tecido do real, “con toda a súa imprecisión e borrosidade”, en palabras do comité.
Joelle Saliba
A cabalo entre novembro e decembro, a escritora e pensadora Joelle Saliba dirixirá o obradoiro de literatura Que é o que pasaría se, que servirá para explorar os mundos posíbeis que poden medrar a partir dun ou dous elementos narrativos: as pezas que actuarán como os puntos de intersección entre un incidente que tivo lugar no mundo real do participante (o que é) e un mundo virtual (o que pasaría se) que se actualizará a través da ficción. Este obradoiro desenvolverase os días 30 de novembro (na Biblioteca de Rianxo, pola mañá e pola tarde) e 1 de decembro (só en horario de mañá, na Casa de Axóuxere en Brión).
Previamente, o día 29 na Biblioteca, Saliba ofrecerá a conferencia Do fondo á fronte: como o espazo se converte nun personaxe. Esta actividade realizarase ás 20 horas, na Biblioteca de Rianxo.
Joelle Saliba (Francia/Líbano) foi elixida este ano para habitar a residencia de Axóuxere “polo intento de escribir, desde a distancia e o exilio, a través de fragmentos autobiográficos, sobre o lugar perdido da súa nenez, o suburbio de Karantina, en Beirut, onde tivo lugar unha masacre durante a guerra civil de 1975”. O comité enxalzou o seu “exercicio de escrita que conversa coa memoria histórica”.
Para máis información sobre o programa de actividades de Axóuxere para este outono, a editorial puxo na súa web un PDF con todos os datos explicados polo miúdo, indicando como facermos a inscrición nos seminarios e obradoiros.
