A Mostra de Teatro de Ribeira depáranos hoxe (este venres 22), unha nova cita cos escenarios: a novena sesión dunha serie de 11 representacións a cargo doutras tantas prestixiosas compañías da nosa terra. Trátase de Carpe diem, de Producións Excéntricas, a agrupación na que milita (entre outros) o ribeirense Quico Cadaval.
Trátase, en palabras da produtora, dun “apaixonado thriller”, brasileiro, musical e cinematográfico, protagonizado por María Costas, Marcos Viéitez, Víctor Mosqueira e con música en directo de Mon Orencio (Mr. Cool). Na dirección, recalando esta noite na súa terra, o devandito Quico Cavadal. A representación comezará ás 21.30 horas no Auditorio.
Carpe Diem, unha adaptación dun texto do portugués Rubem Fonseca (que se representa por vez primeira en Galiza), cóntanos a historia dunha relación entre un home e unha muller que se coñecen nunha festa de fin de ano e que comezan unha historia xuntos malia estaren (os dous) casados. O seu relato compartido, “un drama escaldante”, desenvólvese entre “a fantasía e o cinema”, compartindo escenario co autor (que está no palco manipulando as súas criaturas “coma se fosen ratos de laboratorio”) e un músico que busca “ennobrecer aveludadas melodías o frívolo affaire”. Todo isto, a risco de facer un algo de spoiler, irá desenvolvéndose e anobelándose até desembocar nun crime. Quen queira ver máis detalles sobre a obra ou volver recibir unha nova dose de spoiler sinalarlle que no YouTube hai un tráiler sobre Carpe Diem.
