O grupo municipal do BNG pobrense levará a sesión plenaria unha moción relativa á situación da Policía Local.
Na súa exposición, a formación nacionalista manifesta que pasaron varios meses desde que o xefe da Policía Local se xubilou e o posto foi ocupado por outro axente interino “por nomeamento directo da Alcaldía.” O Bloque considera que xa transcorreu un tempo “máis que prudencial, xa se está rozando o máximo permitido” para que a situación de interinidade sexa superada, procedendo ao inicio dun proceso para cubrir esa praza “da maneira que marca a lexislación pertinente, isto é, mediante unha convocatoria pública conforme aos principios de igualdade, mérito e capacidade.”
Así mesmo, a forza nacionalista expresa que foi coñecedora de falta de medios materiais cos que os axentes están a desenvolver moitas das súas funcións, así como a “non reposición adecuada de elementos necesarios para o seu traballo.”
Por todo isto, o grupo municipal do BNG solicita que o goberno municipal desenvolva, na maior brevidade posible e de acordo á lexislación pertinente, a posta en marcha dunha convocatoria pública para cubrir a praza de Xefatura da Policía Local “conforme aos principios de igualdade, mérito e capacidade”; ademais de que se efectúe a dotación dos medios materiais necesarios “para o correcto desenvolvemento das súas funcións, así como repoñerá os xa obsoletos ou deteriorados.”