A Fundación Banco de Alimentos leva a cabo en centos de supermercados de toda España durante este venres e sábado, 22 e 23 de novembro, a súa VII Gran Recollida Solidaria de Alimentos. Miles de voluntarios estarán a disposición de todos aqueles cidadáns que queiran facer a súa pequena contribución. O Banco de Alimentos de Galicia presta axuda a unhas 100.000 persoas de toda a comunidade, polo que insiste na grande importancia que ten esta cita anual para eles que supón o 10 por cento de toda a recolleita do ano.
O ano pasado, a ONG logrou recadar até un millón de quilos de comida, un éxito que esperan que se repita e incluso se supere este
ano.
Entre os alimentos que máis se necesitan destacan o leite, o aceite, o arroz, o cacao, as galletas, así como as conservas de todo tipo ou os legumes en botes, principalmente produtos non perecedoiros.
O banco de alimentos fará unha segunda recolleita nos supermercados Gadis os días 13 e 14 de decembro. Trátase con isto de desconxestiona-la clasificación de alimentos e lograr produtos máis frescos para o Nadal. Á marxe dos cidadáns que colaboran estes día, o sector empresarial tamén contribúe con grandes cantidades de material e donativos. Con iso o banco de alimentos trata de ser un medio útil á sociedade que, amais de loitar contra a fame, sirva de loita contra os desperdicios.
Á marxe da colecta os donativos pódense comunicar ó número 635 561 280 o longo de todo o ano.
