A Consellería do Mar abriu este luns, 11 de novembro, a campaña extractiva da centola e do boi de mar nas provincias da Coruña e Pontevedra. Segundo informou a Xunta nun comunicado, nas áreas que van da Guarda ata Cabo Corrubedo, na provincia de Pontevedra, e de Cabo Corrubedo ata Estaca de Bares, na da Coruña, a frota con porto basee nesas zonas e que se dedica á extracción destas especies pode calar os aparellos a partir das 00,00 horas da madrugada e levar as especies á lonxa este luns. A campaña destes crustáceos nestas dúas provincias prolongarase ata o inicio da veda do ano 2020 que se fixará a través do Plan de Xestión correspondente.
A cota máxima de captura de cada unha destas especies sitúase en 35 quilos por barco e día, á que se sumarán 35 kg/día por cada tripulante enrolado e a bordo. Poderán participar na campaña todas as embarcacións con artes menores e con porto base en Galicia, así como aquelas que con porto base noutras autonomías, teñan permisos especiais de pesca para faenar nestas augas.
