O Conservatorio de Aguiño vai estar esta finde no punto de mira dos novos músicos da nosa terra: as instalacións acollerán (a partir deste venres e durante toda a xornada do sábado) o segundo encontro na localidade da duodécima edición da Aula Galega de Saxofón, na que participan dezaseis estudantes procedentes de todos os recantos da xeografía galega.
A actividade, que ten periodicidade mensual e está tutelada polo mestre Rodrigo Vila, non remata o capítulo de novidades coa xuntanza destes días en Aguiño. En decembro, de feito, concorrerá o saxofonista estadounidense Phil Pierick, prestixioso e versátil músico de Chicago.
Os encontros desenvolveranse durante os venres á tarde e os sábados todo o día e nos meses de concerto (decembro, marzo e xuño) a previsión é de que haxa actividade tamén os domingos.
Segundo informan dende o Conservatorio de Ribeira, impulsor da Aula, outra das grandes novidades deste curso é o ciclo de clases maxistrais de piano en decembro, marzo e xuño coas pianistas invitadas da Aula, Neus Estarellas, I-An Chen e Hilomi Sakaguchi respectivamente, todas elas recoñecidas pianistas a nivel internacional.
