Na xornada de hoxe arrancou na Pobra do Caramiñal a formación destinada ao sector empresarial turístico para facelo avanzar en competitividade, xestión, comunicación e excelencia. Á inauguración do curso asistiron o presidente da Mancomunidade de Municipios Arousa Norte e alcalde de Boiro, José Ramón Romero; o rexedor pobrense, Xosé Lois Piñeiro; e a coordinadora institucional de IESIDE, Carlota Sánchez.
Xosé Lois Piñeiro manifestou que o obxectivo destes obradoiros radica en mellorar a xestión turística na comarca desde moitos ámbitos.
Pola súa parte, Carlota Sánchez explicou o contido e desenvolvemento destas actividades, nas cales se posibilita “ter a oportunidade de falar con xente que día a día saca adiante o seu traballo nun sector estratéxico para Galicia como é o turístico, que supón máis do 10% do PIB galego e que xera moito emprego.” Ademais, precisou que haberá seis accións formativas, estando o primeiro bloque enfocado no ámbito dixital, mentres que o segundo se orienta ás destrezas persoais.
Na súa intervención, José Ramón Romero apuntou que pretenden potenciar o sector turístico, dándolle valor a través da formación. A parte desta iniciativa, ao longo dos meses de novembro e decembro terán lugar diversas actividades de cara ao Nadal, agardando “promocionar a comarca e traer visitantes.”
Así, o taller A mellora da comunicación dixital celébrase os días 12, 19 e 26 de novembro no municipio pobrense. Esta acción estrutúrase en tres seminarios delimitados pero complementarios: Como optimizar o posicionamento da túa web; A xestión profesional das redes sociais como ferramenta de captación e fidelización de clientes; e Como converter a túa web nunha ferramenta de venta.
Por outra banda, mañá dará comezo en Boiro o obradoiro O desenvolvemento de habilidades e destrezas persoais, o cal se levará a cabo os días 13, 20 e 27 de novembro. Os seminarios que integran esta actividade formativa son tres: Desenvolvemento e innovación de produto e servizo turístico: obradoiro de Service & Desing Thinking; A mellora da comunicación interpersoal e a xestión de conflitos; e A atención ao cliente e as súas claves de éxito.
As accións formarán ao redor da vintena de persoas, sendo impartidas polo IESIDE (Instituto de Educación Superior Intercontinental da Empresa, AFundación Obra Social Abanca) e están financiadas pola Mancomunidade de Municipios Arousa Norte a través da Deputación da Coruña.
