Con motivo do Día Internacional da Eliminación da Violencia contra a Muller, o 25 de novembro, a Concellería de Política Social de Boiro organiza unha programación co obxectivo de concienciar sobre a violencia de xénero para sensibilizar, previr e educar á poboación, facéndoo xa desde a infancia, coa finalidade de chegar a erradicar unha lacra que afecta a toda a sociedade.
A primeira das actividades é o curso de autodefensa para mulleres ante situacións violentas que comezou onte e continuará coa segunda sesión o venres 22.
Así mesmo, o alumnado do IES Espiñeira emprenderá o luns 25 unha andaina polo municipio que conclúe na praza do Concello, lugar no que procederán á realización dunha performance. Coincidindo con esta cita, terá lugar o acto institucional programado para as 13.00 horas e que consistirá nunha concentración dos traballadores municipais e toda a veciñanza que desexe sumarse, con lectura dun manifesto antes da referida performance.
Por outra banda, o Concello boirense participa tamén no programa Machismo sen Miopías, impulsado pola Deputación da Coruña. Esta actividade consta dun obradoiro, repartido en dúas sesións, para previr as violencias machistas a través da identificación e toma de conciencia sobre as mesmas. Do mesmo xeito, o Concello está adscrito á campaña En negro contra as violencias, tal e como se acordou no pleno ordinario do mes de novembro coa aprobación da moción presentada polo grupo municipal do BNG.