Quen traballe ou se atope estes días no mar ou a carón do mar, cómpre que engada un punto extra de coidado, precaución e vixilancia. Dende este xoves 7 de novembro até as 18.00 horas de venres 8, a Xunta activou o aviso de nivel laranxa por mor, principalmente, de ondas que poden de superar os seis metros e do vento de noroeste que roldará a forza 7 de intensidade. Isto polo que respecta ao treito de costa comprendido entre Corrubedo e Ribadeo. O litoral pontevedrés ficará en aviso amarelo por ondas de até cinco metros. Podemos o parte do tempo en Meteogalicia, en formato PDF, no que se explican detalladamente as consecuencias da borrasca de 990 mb que nos afecta.
A Dirección Xeral de Emerxencias, ante as condicións marítimas adversas, lembra a conveniencia de seguir as medidas de protección pertinentes e consultar a súa web www.axega112.gal, polo que se aconsella “a suspensión das actividades pesqueiras e marisqueiras como medida preventiva naquelas zonas máis perigosas”. E termos xerais, recoméndase ficar lonxe da liña de costa e das praias e paseos marítimos co fin de previr “un eventual golpe de mar que poida arrastrar persoas ou obxectos”. Ademais, é preciso evitar aproximarse a diques, rompentes, espigóns, peiraos e todas aquelas zonas que poidan ser varridas polo mar e vixiar posibles caídas de obxectos de balcóns e fiestras.
No interior, activarase a alerta amarela por neve en zonas de montaña das provincias de Lugo e Ourense que se prolongará ata a tarde de mañá. Nestas zonas, agárdase acumulación de máis de 5 centímetros de neve en cotas en torno aos 1.100 metros.