A ruta + que tapas conclúe esta fin de semana en Ribeira

Tras o seu paso por Boiro, Rianxo e A Pobra, a quinta edición da ruta + que tapas finaliza en Ribeira. Así, o itinerario gastronómico impulsado pola Mancomunidade de Municipios Arousa Norte poderá realizarse polo concello ribeirense a partir do venres 29, desde as 20.00 ata as 23.00 horas, así como o sábado 30 e domingo 1 de decembro, en horario de 12.00 a 14.00 horas e de 20.00 a 23.00 horas. Como actividade complementaria na xornada do venres, ás 21.30 horas, o Auditorio municipal dará cabida á representación da peza teatral Elisa e Marcela, de A Panadería; mentres que o sábado, desde as 12.00 ata as 14.00 horas, o soumiller Juan Figueroa Treus aconsellará aos clientes dos locais sobre que viño acompañar con cada petisco.

O prezo da tapa establécese nos 2’50 euros e os establecementos de Ribeira que toman parte nesta iniciativa son Cocoluche, A Bodega, Esmorga, A Recoveira, O Tear, O Niño do Cuco e Aljan.

Cómpre destacar que os tres primeiros clientes en pedir un petisco nalgún dos locais anteriormente enumerados durante o día de apertura da ruta, terán como premio unha entrada para concerto de Julián Maeso que se celebrará o 30 de novembro en A Pousada da Galiza Imaxinaria, no municipio de Boiro. Ademais, tódolos participantes entran nun sorteo de catro bonos gastronómicos e un concerto exclusivo que terá lugar antes de que finalice o presente ano.

Por outra banda, este evento gastronómico conta coa colaboración dos bodegueiros de Viños da Terra de Barbanza e Iria, propoñendo maridar os petiscos cos seus caldos.