Ribeira abre do 2 ao 15 de decembro o prazo de preinscrición dos campamentos de conciliación do Nadal Cultural 2019. Así, ofértanse dúas modalidades. Por unha banda, o Campamento Multidisciplinar Nadal Concilia, dirixido a nenos e nenas nados entre o 2011 e o 2016 das parroquias de Santa Uxía e Palmeira, cunha capacidade para 120 participantes distribuídos en catro grupos e que terá lugar no Conservatorio municipal, en horario de 09.00 a 14.00 horas, entre o 23 de decembro e o 7 de xaneiro (inclúe o 24 e o 30 de decembro).
Doutro lado, está o Campamento Multidisciplinar Nadal Xogo, con dúas sedes, unha na Casa de Cultura de Aguiño (para as parroquias de Aguiño, Carreira e Castiñeiras) e outra no Centro Social de Oleiros (para Oleiros, Corrubedo, Olveira e Artes). Está dirixido a nenos e nenas nados entre o 2011 e o 2015, cunha capacidade para 60 participantes distribuídos en dous grupos e desenvolverase de 09.00 a 14.00 horas entre o 23 de decembro e o 7 de xaneiro (inclúe o 24 e o 30 de decembro).
En ambos casos, o prezo da matrícula establécese nos 24 euros, efectuándose un 20% de desconto para familias numerosas, desempregados de longa duración e persoas con discapacidade de, polo menos, un 33%. Ademais, reservaranse un 10% das prazas para emerxencia social.
De encherse a cota, a orde de prioridade será a seguinte: participantes empadroados en Ribeira, proxenitor (pai/nai/titor) en activo e orde de inscrición.
Os interesados poden formalizar a preinscrición cubrindo un formulario online a través da páxina web www.riveira.es desde as 09.30 horas do 2 de decembro ata as 23.59 horas do 15 de decembro; ou de xeito presencial no Centro Cultural Lustres Rivas, en horario de 09.30 a 13.30 horas, de luns a venres. Tamén se posibilita solicitar máis información mediante o teléfono de contacto 981835650 ou o enderezo electrónico culturaefestexos@riveira.com.