O Club Náutico Arousa Norte bota a andar a primeira Regata á Inversa-Trofeo ALCA, destinada á clase cruceiro. Esta cita disputarase o sábado 30 nas augas da ría de Arousa, establecendo as 13.30 como hora teórica da saída do primeiro barco en función da súa velocidade, sendo o máis rápido o último en zarpar.
Así, entregarase a tódalas embarcacións un listado coas horas exactas de saída e o Comité de Regatas dará a hora oficial ás 13.15, 13.20 e 13.25 co obxectivo de permitir aos participantes a sincronización dos seus reloxos.
Cada barco dispón dun máximo de 10 minutos para saír a partir da súa hora correspondente e aqueles que non se atopen no seu momento de zarpar detrás da liña de saída, deberán volver a saír e informar ao Comité de Regatas.
