Aviso a quen traballe ou estea a partir desta noite no mar ou preto do mar: a Xunta vai activar, a partir de mañá, o aviso de alerta vermella para boa parte do litoral galego (as provincias da Coruña e Pontevedra). O aviso achegado pola Dirección Xeral de Emerxencias e Interior abrangue tamén a costa dos concellos de Barbanza, onde se poden acadar (nas zonas de mar máis aberto principalmente) ondas de até 10 metros e vento (oeste-noroeste) que pode chegar a ser de forza 9.
No interior hai aviso laranxa por neve, situándose a cota arredor dos 800 metros. O temporal vén desencadeado por unha borrasca que vai entrar a primeiras horas desta tarde, deixándose sentir xa na costa da Coruña.
A Dirección xeral explica que debido a que o fenómeno meteorolóxico coincide con mareas vivas e máximos de ondaxe na preamar é probábel que teña especial incidencia en “puntos sensibles”, na Costa da Morte e nas Rías Baixas. A situación manterase ata o remate da xornada deste xoves, que pasará a ter alerta laranxa para todo o litoral galego.
Por mor do temporal, aconséllase a suspensión das actividades pesqueiras e marisqueiras como “medida preventiva naquelas zonas máis perigosas”. Unha recomendación que é extensíbel á pesca deportiva e a outras actividades deportivas no mar. A Dirección Xeral tamén insta a extremar as medidas de seguridade á hora de realizar calquera outro tipo de actividade no mar e que “se revisen os cabos e amarres das embarcacións”. Ademais, aconséllase consultar a páxina web do CAE 112 (www.112galicia.org), que conta con información meteorolóxica e con ligazóns de interese.