O Centro Cultural Lustres Rivas de Ribeira albergou na mañá do sábado 9 unha dobre actividade de balde, na que servíndose do conto como principal vehículo de sensibilización, a escritora Eva Mejuto quixo facer reflexionar aos asistentes en torno á violencia e desigualdade de xénero.
Primeiramente, tivo lugar a charla-taller Voces Violetas, a través da cal se analizou a presenza de micro e macro machismos por medio de narracións, cancións e personaxes literarios ou televisivos.
Posteriormente, ofreceuse unha función de contacontos na que os máis pequenos puideron percibir cales son os roles máis habituais dos personaxes femininos e masculinos nos contos.
A actividade estivo promovida en colaboración coa Rede de Dinamización Lingüística da Xunta de Galicia, enmarcada no Pacto de Estado contra a Violencia de Xénero.
