A Deputación da Coruña presentou o seu plan de investimentos para o ano vindeiro, unha folla de ruta marcada pola “flexibilidade” e pola busca de “estabilidade” para todas as administracións implicadas: a propia entidade provincial e mailos concellos. O orzamento, de 184 millóns de euros, representan un 0,22% máis cós do ano pasado. “Un ano máis, todos os investimentos e plans da Deputación financiaranse con recursos propios, mantendo a actual situación de débeda cero”, explicou a institución que preside Valentín González. As contas foron dadas a coñecer polo titular da Deputación e polo vicepresidente Xosé Regueira.
Entre outras cousas, González Formoso destacou na súa intervención a importancia do Plan Único, o principal programa de investimentos da Deputación, que cada ano supera os 90 millóns de euros transferidos directamente aos concellos (en 2019 chega a 100 millóns) mediante criterios de distribución claros e obxectivos.
Pola súa banda, o vicepresidente da Deputación sinalou o exercicio de “responsabilidade política” que significa a aprobación das ditas contas, que “permitirán o funcionamento dos concellos da provincia” e manifestou o seu desexo de que o próximo Goberno estatal permita aos concellos utilizar o superávit, tal como demanda a FEMP. “É o mellor orzamento que pode facer a Deputación neste momento”, dixo Regueira, que coincidiu co presidente na “necesidade urxente de abrir unha negociación coa Xunta para transferir as competencias impropias que está asumindo a Deputación”.
Entre os principais capítulos de investimentos dos Orzamentos 2020 destacan o Plan Único, cunha consignación inicial de 41,2 millóns de euros que se distribuirán con criterios obxectivos entre os concellos coruñeses; os 11,8 millóns que se destinarán á área de acción social da Deputación, que inclúe 7 millóns de euros para a contratación de 280 profesionais dos servizos sociais e de asistencia no fogar dos municipios coruñeses, ou os 10,1 millóns destinados a Cultura, que inclúen máis de 2,5 millóns para a Rede Cultural.
A Deputación consigna tamén 9,1 millóns iniciais para o Plan de Emprego Local 2020 e máis de 18 millóns para os distintos programas de obras, conservación e construción de sendas e mellora de travesías nos máis de 2.100 quilómetros da rede provincial de estradas.
Na área de Promoción Económica, a Deputación reserva máis de 8,1 millóns de euros que se destinarán, entre outras cuestións, ao mantemento dos dez parques do Consorcio Provincial de Bombeiros (3,7 M€), apoio a confrarías de pescadores (463.000 €) ou fomento agrícola e gandeiro (603.000 €)
