A Asociación Rianxeira de Empresarios (ARE) convoca eleccións á Presidencia. Aínda que o mandato da actual Presidente expira o vindeiro mes de febreiro, tomouse a decisión de adiantar as eleccións a finais deste ano co fin de que a Xunta Directiva que resulte deste proceso electoral poida empezar o ano 2020 a pleno rendemento.
A convocatoria xa foi remitida aos asociados xunto co calendario fixado para o proceso electoral que rematará o 19 de decembro coa celebración das eleccións nunha Asemblea Xeral Extraordinaria convocada para as 20.00 horas, en primeira convocatoria, e para as 20.30 horas, en segunda.
Segundo o calendario electoral, as candidaturas poderán presentarse entre os días 27 de novembro e 3 de decembro, ambos incluídos. Estas candidaturas deberán conter, segundo o establecido nos estatutos vixentes, a presentación do candidato a Presidente, a composición da Xunta Directiva que deberá dispor dun mínimo de tres compoñentes e o programa electoral.
O 9 de decembro realizarase a comunicación pública de candidaturas válidas e non válidas e, desde ese mesmo día ata o 13, estará aberto o prazo para a presentación de alegacións.
A proclamación definitiva de candidaturas terá lugar o 16 de decembro.
