Ribeira acollerá a partir do mes de decembro un curso para desempregados sobre atención sociosanitaria a persoas no domicilio. Esta acción formativa consta dun total de 15 prazas e celebrarase do 9 de decembro ao 10 de xuño nas aulas da rúa Cristóbal Colón, constando dun total de 618 horas lectivas, 120 das cales son prácticas nalgunha empresa, entidade ou concello da contorna.
Ademais de estar en situación de busca de emprego, para realizar a acción cómpre posuír o título da Educación Secundaria Obrigatoria (ESO) ou equivalente. Aquelas persoas que superen o curso recibirán un certificado de profesionalidade nivel II.
Os interesados poden dirixirse á Oficina de Desenvolvemento Local situada na área de Atención Cidadá, no andar baixo do Consistorio.
A formación está organizada polo Concello ribeirense en colaboración coa Consellería de Economía, Emprego e Industria da Xunta de Galicia.
