20191018. Unha vintena de alumnos e alumnas comezaron hoxe a súa aprendizaxe nun curso básico de Protección Civil organizado pola Academia Galega de Seguridade Pública no municipio de Ribeira.
Así, o acto de apertura celebrouse esta tarde no Centro Cultural Lustres Rivas, contando coa participación de Víctor Vázquez, xefe do servizo de emerxencias na Coruña da Consellería de Presidencia, Administracións Públicas e Xustiza da Xunta; Víctor Reiriz, concelleiro de Seguridade e Mobilidade Cidadá do Concello; José Francisco Parente, presidente da Agrupación de Voluntarios de Protección Civil de Ribeira; Francisco Sánchez, presidente de honra desta mesma agrupación; e Marcos Fernández, responsable do Grupo de Apoio e Emerxencias Municipal (GAEM).
Este curso trátase do primeiro que se imparte neste municipio desde o 2016 e conta con alumnado procedente de distintos puntos da comarca e outros territorios coma Padrón, Ames, Mazaricos ou Carnota. Desenvolverase os días 18, 19, 20, 25, 26 e 27 de outubro, constando dunha parte teórica e outra práctica. Deste xeito, abarcará diversas temáticas coma extinción de incendios urbanos e forestais, primeiros auxilios, comunicacións, igualdade ou accidentes de tráfico, entre outros.
