A Fiscalía solicita á Audiencia Provincial dez anos de prisión e inhabilitación especial durante o tempo de condena para un home acusándoo dun delito de homicidio en grao de tentativa con agravante mixta de parentesco e agravante de xénero.
Os feitos remóntanse a cando o procesado J.C.P.A., maior de idade e con antecedentes penais xa cancelados, se atopaba ás 08.00 horas do 25 de agosto de 2018 nas inmediacións do domicilio da súa ex-parella, situado en Ribeira. Segundo recolle o texto, o individuo atopábase escondido no portal contiguo, “á espera de que a mesma saíse do citado domicilio para ir traballar, posto que coñecía os seus horarios e rutinas” para abordala en canto saíu á rúa. Nun primeiro momento, ela non o recoñeceu porque el ía vestido con bufanda e gorro que lle tapaban parcialmente a cara.
Tras abordala, segundo relata a fiscal, díxolle “vén aquí que quero falar contigo e aquí non nos ve ninguén”, mentres que a agarraba polo pescozo para, a continuación, arroxala contra dous vehículos estacionados, producíndolle un forte golpe nas costas. Nese intre, “actuando con ánimo de matala, empuñou un coitelo de cociña de grandes dimensións (duns 25 cm) e intentou cravarllo no pescozo.” O escrito prosegue apuntando que non o logrou porque a vítima conseguiu agarrar a arma cunha man, ao mesmo tempo que “forcexeaba con el” e gritaba pedindo auxilio. Os veciños escoitárona e acudiron na súa axuda, momento no que o acusado abandonou o lugar nun coche.
Segundo o Ministerio Público, o procesado “tivo como motivación actuar en vinganza ante a negativa reiterada da vítima, nos últimos 3 meses previos ao ataque, de volver reanudar a relación sentimental con el, tratando este de impoñer a súa vontade e dominala pola súa condición de muller.”
Ademais dos dez anos de cárcere polo delito mencionado anteriormente, a Fiscalía solicita que o procesado, “como responsable civil directo”, indemnice á vítima con 10.000 euros polas lesións e secuelas sufridas.
O xuízo celebrarase entre o luns e o martes da próxima semana na sección primeira da Audiencia Provincial de A Coruña.
