20191022 O proceso de normalización da presenza do galego non chega de maneira uniforme á sociedade, hai contornas onde é máis que natural a súa presenza e outras, por prexuízos ou falsas crenzas que teiman en manterse, nas que non. Neste último caso sitúase o ámbito funerario, onde aínda hoxe, con todo que ten chovido, é raro ver información en galego ou escoitalo nos actos vencellados ao falecemento dunha persoa.
Dende Normalización Lingüística do Concello de Rianxo queren inverter esta situación, de aí que se convocase un acto público e aberto para a cidadanía (o acto Para sempre, en galego) que ten o obxectivo de “promover a nosa lingua nos actos funerarios”, como por exemplo publicación de necrolóxicas, inscricións nas lápidas ou redacción de testamentos.
Incluirase na convocatoria unha lectura pública de mandas testamentarias e a sinatura dunha declaración individual de vontade de seren despedidas/os e lembradas/os en galego.
A iniciativa, que estará presidida polo alcalde Adolfo Muíños, levarase a cabo o día 31 de outubro, no Cemiterio Municipal a partir das 17.00 horas. A convocatoria, como dixemos, está aberta á veciñanza en xeral, que para participar na lectura debe dirixirse ao Servizo de Normalización Lingüística a través do 881 988 891 ou mediante a conta de correo electrónico normalizacion@concelloderianxo.gal.
Para quen non o saiba, unha manda testamentaria é un pequeno texto xurídico onde alguén recolle unha parte importante dos afectos e sentimentos que se queren transmitir aos herdeiros e a obriga de dar cumprimento ao desexo de administrar o patrimonio común, neste caso, a lingua e a cultura de Galicia.
