20191002 A Biblioteca Municipal de Ribeira achega este mes de outubro unha exposición bibliográfica sobre algunhas das máis recoñecidas plumas da literatura hispánica de todos os tempos: as que foron distinguidas co que está considerado o galardón máis importante do mundo, polo menos o que máis repercusión ten a nivel internacional e máis contía económica pon en xogo, o Premio Nobel de Literatura. A mostra de libros e material diverso, que vén a conto polo trixésimo aniversario da concesión do dito recoñecemento ao galego Camilo José Cela, acubilla once escritores distinguidos nesta mesma categoría.
Trátase de obras de José Echegaray, Jacinto Benavente, Juan Ramón Jiménez, Vicente Aleixandre, Camilo José Cela, Gabriela Mistral, Miguel Ángel Asturias, Pablo Neruda, Gabriel García Márquez, Octavio Paz e Mario Vargas Llosa, así como carteis conmemorativos con textos de cada un dos citados escritores.
Esta exposición, como dixemos, estará presente durante todo o mes de outubro.
Ricardo de Barreiro
Por outra banda o Concello lembra que a pasada fin de semana, no Centro Cultural Lustres Rivas, celebrouse un concorrido acto de presentación/performance do audio libro A+A de Ricardo de Barreiro, ao que se sumaron unha trintena de asistentes.
