A Biblioteca Municipal da Pobra vai acoller este venres 25 unha máis que interesante actividade de animación á lectura e á creatividade entre a rapazada. Trátase do espectáculo Ula Lúa?, que é unha versión para monicreques do libro ilustrado do mesmo título de Celtia Figueiras e cuxa representación correrá a cargo do grupo Xanela do Maxín.
A protagonistas da obra é a gatiña Lúa, unha michiña pequena que soña con viaxar, coñecer novos lugares e facer novas amizades. Lúa vive coa súa avoa nunha humilde casa e no exterior contan cun fermoso xardín no que a gatiña pasa as horas xogando soa. A obra de Celtia Figueiras é, ante todo, unha historia de amor e de amizade, onde “valores como a tenrura, o respecto ou a solidariedade cobran importancia para levarnos a un mundo onde a ilusión fai dos soños unha realidade”.
O espectáculo está previsto para as 18.00 horas e está dirixido a nenas e nenos de 3 anos en adiante. Organizan o Concello e a Rede de Bibliotecas de Galicia ao abeiro do programa Ler Conta Moito.
