Un total de quince persoas inician a súa formación no obradoiro dual de emprego sobre cociña que, baixo o título de O Pote, se desenvolverá durante nove meses na nova Escola de Hostalería de Ribeira situada no segundo andar do mercado municipal.
A apertura do taller contou coa presenza do alcalde de Ribeira, Manuel Ruiz; o concelleiro de Promoción e Dinamización Económica, Ramón Doval; e a secretaria da delegación territorial da Xunta na Coruña, Patricia Rodríguez.
O Pote trátase dun obradoiro dual de emprego promovido polo Concello de Ribeira e subvencionado pola Xunta de Galicia ao abeiro da Orde do 17 de abril de 2019 polo que se establecen as bases reguladoras para as axudas e subvencións para os obradoiros duais de emprego da Comunidade Autónoma de Galicia. Ademais dos quince alumnos-traballadores, foron seleccionados unha directora -Almudena Basoco-, un profesor de cociña, un titor e unha auxiliar administrativa.
O contido desta acción formativa abrangue, entre outras actuacións, a realización de almorzos solidarios para seren distribuídos entre as persoas desfavorecidas do municipio, o que lle aporta un compoñente social ao taller.
Unha vez conclúen a súa formación, os participantes terán a oportunidade de realizar prácticas en empresas que serán subvencionadas polo Concello e recibirán un certificado nivel 2 que acredite as súas competencias.
O rexedor destacou que “Ribeira ten a sorte de ser, posiblemente, o concello de Galicia que máis obradoiros de emprego teña levado adiante.” Neste senso, manifestou que o taller posibilita “ter un título e ter un traballo, ademais de contribuír a que a imaxe da comarca no sector turístico saía moi favorecido.”
Pola súa parte, a secretaria da delegación territorial expresou que o obradoiro ten un dobre obxectivo: mellorar a cualificación profesional e acadar unha adecuada inserción laboral. Tamén sinalou que “desde a Xunta de Galicia se aposta decididamente polos obradoiros polas múltiples vantaxes que teñen”, coordinándose cos concellos porque “son os que mellor coñecen as necesidades e fortalezas dos seus territorios.”
O obradoiro desenvólvese na Escola Municipal de Hostalería que se acaba de crear no segundo andar do mercado municipal cunha inversión de ao redor de 250.000 euros, e que está equipado con cociñas individuais para profesor e alumnado despregado nunha zona de 137 metros cadrados, ademais doutros espazos como unha aula de formación, dous almacéns e un despacho para a dirección do obradoiro, entre outros.
A intención do Executivo ribeirense é que unha vez remate o obradoiro seguir impulsando neste espazo novas actividades que redunden na formación e perfeccionamento do sector hostaleiro do municipio.
