20191016. O Centro Social de Escarabote, no municipio de Boiro, acollerá o sábado 19, ás 12.00 horas, o espectáculo de teatro musical O Lobo Bobo, a cargo de Elefante Elegante, e dirixido a cativos con idades comprendidas entre os 3 e 7 anos. Nesta cita, Gonçalo Guerreiro mestura os contos de sempre, creando unha nova historia na que conviven o cómico e o poético co teatro xestual e a música. Ademais, trátase dun espectáculo interactivo, onde as marionetas cobran vida nas casas que se van construíndo diante dos ollos dos espectadores a medida que se narran as novas aventuras dos personaxes dos clásicos infantís. Deste xeito, tentará dar resposta a preguntas coma “que pasaría se o lobo de Carapuchiña se fixese vexetariano?” ou “que acontecería se a Madrasta de Branca de Neve se convertese nun dos tres Porquiños por mirarse tanto no espello máxico?”
