20191021 O Concello de Ribeira informou da saída a contratación dos traballos destinados a repoñer o pavimento asfáltico na estrada da estrada da Perdigoteira, na parroquia de Artes. A obra ten un orzamento de licitación de 76.544 euros e un prazo de execución de dous meses. A orixe desta actuación está na necesidade de optimizar o firme de calzada do dito vieiro, na actualidade moi deteriorado, “especialmente nalgúns treitos”.
O obxectivo principal é mellorar a estrada “a través dunha capa de aglomerado asfáltico en quente de seis centímetros de espesor”, sinalou o Concello, engadindo que o proxecto técnico implica a limpeza das marxes e o acondicionamento da superficie, a aplicación dunha capa de mestura bituminosa en quente de 6 centímetros de espesor nunha superficie de 866 toneladas, o recrecido de tapas de rexistro á cota do novo pavimento e o pintado da sinalización viaria.
As empresas interesadas dispoñen ata o 28 de outubro ás 0.00 horas para presentar as súas ofertas a través da Plataforma de Contratos de Galicia.
