20191008. A décima edición do certame de cine OUFF Escola achegou o cine a máis de 2.000 escolares de centros de Primaria e Secundaria de toda Galicia que presentaron os seus traballos. Entre eles, houbo representación dos municipios de Arousa Norte, pois o CEIP Plurilingüe de Palmeira fíxose co 1° Premio en categoría infantil ou primaria coa curta Agapito vai de viaxe. Nesta historia, Agapito, mascota da biblioteca da escola de Palmeira, emprende unha viaxe á illa de Sálvora para encontrarse coa serea Mariña.
A gala de entrega destas distincións, presentada polo actor Fernando González, reuniu aos centros educativos participantes no Auditorio de Ourense, contando coa asistencia de representantes do Concello ourensán e da Secretaría Xeral de Política Lingüística.
A nova convocatoria encádrase na vixésimo cuarta edición do Festival de Cine Internacional de Ourense (OUFF 2019), tendo como obxectivo impulsar o uso do galego entre a xuventude, coñecer a visión desta sobre o seu entorno sociocultural e fomentar a creatividade audiovisual e o traballo en equipo, nunha linguaxe atractiva para o alumnado, contribuíndo a xerar un espírito crítico.
