O CEIP Ana María Diéguez inaugura no Museo do Pobo Galego unha mostra sobre o patrimonio de Asados

29 Outubro 2019

O Museo do Pobo Galego (Compostela) acolle dende a semana pasada unha exposición con fonda pegada rianxeira. Trátase dunha mostra na que se exhiben os proxectos educativos gañadores da undécima edición do Proxecto Didáctico Antonio Fraguas, pertencentes ao CEIP Ana María Diéguez de Asados (na categoría de ensino primario) e ao CPR María Inmaculada de Silleda (modalidade de ensino secundario).

Polo que se refire ás contribucións do colexio rianxeiro, trátase dunha colección presentada baixo o título Pintando o patrimonio e cun marcado interese por visualizar elementos da importante riqueza etnográfica, histórica e cultural da contorna de Asados e Rianxo. A mostra, elaborada ao longo dun ano de traballo, consiste na reprodución por treitos dun mural colectivo de 50 metros que sintetiza, resume e potencia a mensaxe básica do proxecto: reivindicar os tesouros, a identidade e o pasado da contorna de cada quen. Este mural orixinario está situado nas paredes exteriores do centro educativo. A exposición no museo compostelán inclúe tamén cunha escolma de traballos do alumnado e cunha serie de vídeos accesíbeis mediante códigos QR onde os nenos e nenas do CEIP Ana María Diéguez amosan e explican, coa axuda dos dispositivos móbiles dos visitantes, distintos elementos do patrimonio material e inmaterial da súa parroquia.

A exposición foi inaugurada o 26 de outubro polo secretario xeral de Política Lingüística, Valentín García, e o presidente da Fundación Antonio Fraguas, Xusto Beramendi, entre outras personalidades.

O certame veu da man da Fundación Antonio Fraguas Fraguas, coa colaboración da Xunta de Galicia a través da Consellería de Cultura e Turismo. As dúas iniciativas gañadoras (a de Asados e a de Silleda) foron premiadas en xuño de 2018 con 7.000 euros destinados a que ambos os centros educativos desenvolvesen o seu proxecto e montasen cadansúa mostra co resultado da súa execución. O resultado é o que podemos ver estes días no Museo do Pobo Galego.

Valentín García, na inauguración, salientou o esforzo realizado por profesorado e alumnado para crear dúas exposicións que “cumpren con creces as expectativas que tiñamos hai un ano cando se premiou o voso proxecto” e animou os rapaces e rapazas presentes “a seguir interesándovos polo noso patrimonio cultural e lingüístico, co fin de que o apreciedes, o respectades e traballedes sempre para que sexa patrimonio vivo”.

Outros artigos

Publicidade

Revista en papel

Opinión

“Oporto”. Alberto Barciela

“Oporto”. Alberto Barciela

Oporto puede seguirse en el sentido serpenteante de un río, o en la vertical de un océano, ascenderse o descenderse por meandros encajados en calles que a veces semejan acantilados, que siempre se precipitan hacia agua, una urbe universal cerca del tiempo que le tocó...