A Academia Galega de Seguridade Pública na Estrada acolleu esta fin de semana unha cerimonia na que foi recoñecido o labor de máis dunha vintena de voluntarios e 29 agrupacións de Protección Civil nun acto promovido pola Asociación Nacional de Agrupacións de Voluntarios de Protección Civil.
Entre os distinguidos figuran quen fora fundador da entidade ribeirense, Manuel Dieste Mos, coa Cruz de Servizos Distinguidos na categoría de ouro, outorgada a título póstumo. Así mesmo, a Agrupación de Voluntarios de Protección Civil de Ribeira e de Rianxo foron premiadas polo seu labor coa Placa ao Mérito na súa categoría de ouro.
Desde a agrupación ribeirense manifestaron que “este é un aliciente para continuar co traballo constante e de servizo desinteresado a toda a sociedade por e para a seguridade de Ribeira e demais Concellos nos que vimos desempeñando o noso labor desde que o fundador deste servizo, Manolo Dieste, impulsou a creación de Protección Civil Ribeira.”
O acto contou con presenza da contorna. Entre outros, asistiron o alcalde de Ribeira, Manuel Ruiz; o rexedor de Rianxo, Adolfo Muíños; o concelleiro ribeirense de Seguridade e Mobilidade Cidadá, Víctor Reiriz; o presidente de honra de Protección Civil de Ribeira, Francisco Sánchez; o presidente actual, José Francisco Parente; e o presidente de Protección Civil de Rianxo, Manuel Gómez Villanustre; ademais da nai e a irmá de Manuel Dieste.