Con motivo da Mostra de Teatro de Ribeira, o Auditorio municipal será escenario o venres, 1 de novembro, ás 21.30 horas, da posta en escena de Invisibles, a cargo de Redrum Teatro. Baseado no libro do mesmo nome de Montse Fajardo, presenta sete testemuños reais de maltrato a través de tres voces femininas. Tres xeracións de mulleres que amosan que non hai un perfil concreto de vítima de violencia machista. Así, o obxectivo deste espectáculo é concienciar e sensibilizar aos espectadores sobre unha lacra que afecta a toda a sociedade, facéndoa ben visible para poder eliminala.
O elenco está composto polas actrices Sheyla Fariña, Mela Casal e Nieves Rodríguez, baixo a dirección de Marián Bañobre.
Esta peza teatral trátase dunha coprodución entre Redrum Teatro, a Concellería de Igualdade do Concello de Pontevedra, o Centro Dramático Galego e a Deputación da Coruña.
Ademais, conta con varias distincións coma os galardóns a Mellor Adaptación, Mellor Dirección e Mellor Iluminación dos Premios de Teatro María Casares; así como o Premio Luísa Villalta a Proxectos de Igualdade concedido pola Deputación da Coruña.
Cómpre lembrar que a totalidade dos bonos para a mostra foron vendidos, polo que o aforo xa está completo.
