20191017 Este venres 18 de outubro comeza en Rianxo oficialmente a cuarta edición da Mostra de Teatro Afeccionado Alter Ego, organizada pola Agrupación Teatral Criaturas, en colaboración co Concello e a Deputación da Coruña. O programa de representacións desenvolverase na segunda quincena do mes de outubro, concretamente, os días 18, 19, 25 e 26. Este venres as actividades comezan da mellor maneira posíbel: con teatro de calidade que fale de cuestións universais que seguirán séndoo (universais) dentro de cincocentos anos. É o caso de Estrafalaria, de Xarope Tutú, que abre o programa ás 18.00 horas na Biblioteca Municipal.
O espectáculo Estrafalaria é unha representación de Atenea García que salienta por varios motivos fundamentais, entre os que se conta o formato adoptado (trátase dun espectáculo que combina a narración oral coa manipulación de obxectos onde o público participa activamente do relato) e pola historia que se conta (o día a día dunhas personaxes que levan a diferenza por bandeira). A obra, recomendada para crianzas a partir dos tres anos, fala da importancia de sensibilizar á rapazada acerca de todo o amplo abano de realidades persoais coas que van ter que convivir: “As cativas e os cativos deben entender a diversidade como algo enriquecedor e imprescindíbel para que a sociedade evolucione cara o mundo que queremos, ese no que debería predominar a tolerancia, a solidariedade e a integración”.
Xa pola noite, ás 21.00 horas, a mostra proseguirá no Auditorio de Rianxo co espectáculo O Inspector, a cargo de Teatro Muxicas, agrupación composta por actrices e actores invidentes e pertencente á organización ONCE. O espectáculo O inspector está baseado na obra de Nikolai Gogol, con dirección de Tito Asorey. Conta, no seu argumento, a chegada a unha cidade xestionada por políticos corruptos dun inspector do goberno que ten a misión de realizar unha auditoría sobre as contas públicas e elaborar un estudio sobre a limpeza das prácticas políticas dos seus dirixentes. Esta situación fará que os gobernantes teñan medo do que poida atopar o representante do goberno e proceden á destrución de todas as probas.
Máis actividades
O sábado 19, a Biblioteca será escenario de Gale, Historia da Lingua con Celtia Figueiras, ás 12.00 horas, e de Regueifando con Regueifeiros de Galicia, ás 18.00 horas, para dar paso no Auditorio, ás 21.00 horas, a Insania de Agrupación Teatral Mariñán.
Por outra banda, o venres 25 desenvolverase Xente de pálida pel, a cargo de Estudio de Teatro Casahamlet, no Auditorio, ás 21.00 horas. A última xornada, a do sábado 26, disporá de Cambia o conto de Miguel Alonso, ás 12.00 horas, na Biblioteca; así como de Tía Anita y su fantasma con Cardume Teatro, ás 21.00 horas, no Auditorio.
O prezo de entrada por actuación establécese nos 2 euros, podendo adquirise no Auditorio unha hora antes de cada función.