20191011. A Garda Civil do Posto de Boiro procedeu á detención dun home e dunha muller, veciños da mesma localidade, por tres delitos de furto de carteira e estafa continuada. Os presuntos autores dos feitos utilizaron as tarxetas de débito das carteiras subtraídas co sistema de pago contactless para realizar ata 23 compras en comercios de Boiro e A Pobra do Caramiñal.
A vítima dun dos furtos de carteiras é unha persoa de avanzada idade, á que supostamente axudaron a entrar no seu domicilio, apoderándose de 750 euros.
O importe total dos delitos contra o patrimonio e a orde socioeconómica ascenden a 1136 euros. Con estas detencións conseguiuse atallar o exponencial incremento de actividade delituosa que estes dous individuos experimentaron nos últimos tempos.
A instrución das dilixencias está a cargo do Xulgado de Garda de Ribeira.