20191016 David Chipperfield, o prestixioso arquitecto británico afincado en Corrubedo, onde posúe residencia de seu e onde pasa longas tempadas dende hai máis de dúas décadas, vén de obter un novo recoñecemento á súa carreira que, ademais, vén co engadido extra de ser unha distinción ao seu compromiso con Galicia e co Barbanza, de cuxa cultura, historia e paisaxe é un dos seus grandes embaixadores. Estamos a falar do Premio Galego do Ano que concede o Grupo Correo Gallego, galardón que lle foi entregado na gala dos premios o pasado venres.
O arquitecto, que recentemente acadou un gran fito na súa carreira ao inaugurar en Berlín o museo James-Simon-Galerie, a porta de acceso á Illa dos Museos da capital xermana, quixo compartir o recoñecemento coa súa familia e cos colegas da Fundación RIA, entidade impulsada polo propio Chipperfield para mellorar con humanización, recuperación e sustentabilidade o urbanismo e a habitabilidade das localidades do Barbanza.
O arquitecto inglés tamén quixo compartir o premio coa nosa terra, unha homenaxe que veu acompañada dunha proclama a xuntar esforzos para reivindicar e salvagardar o que temos para as vindeiras xeracións: “Aínda que só sexa un galego por vontade estou suficientemente comprometido con Galicia como para suplicarvos que protexades e apreciedes esta terra, que consideredes a súa natureza non só como un decorado, senón como o voso maior capital natural e a garantía para o voso futuro”.
Tamén tivo palabras para enxalzar os ámbitos nos que Galicia é un referente: “Galicia é un exemplo destacado para o resto de Europa como unha Comunidade autosuficiente alimentada pola natureza, a súa xente e as súas tradicións”. É a imaxe, continuou, “dun país moderno que mostra a outros como equilibrar o desenvolvemento económico e a consideración do seu capital natural”, onde a calidade de vida está asegurada e “a próxima xeración recibe os alicerces dun futuro seguro”.
