O Grupo Municipal de Teatro de Ribeira viaxará o sábado 26 ao municipio de Teo para participar no programa Outono Teatral organizado por este concello.
As máis de vinte actrices e actores afeccionados que compoñen o elenco, baixo a dirección de Óscar Romero, interpretarán a obra Cousas de Castelao, estreada con gran éxito en setembro do pasado ano no marco da Mostra de Teatro de Ribeira, desenvolvéndose posteriormente outras representacións e sobresaíndo os sketches na rúa celebrados no marzal pasado para conmemorar o Día Mundial do Teatro.
A función deste sábado dos ribeirenses terá lugar no Auditorio Constante Liste, ás 21.30 horas. Nesa mesma xornada, ás 12.00 horas, haberá unha primeira actuación a cargo Animar-Te co título Onde está o vento?, realizándose na Mediateca do Grilo e dirixida a crianzas de 0 a 3 anos.
