Cambios nas mesas electorais de Boiro para os comicios xerais do 10-N

Con motivo das eleccións xerais do 10 de novembro, o Concello de Boiro celebrou esta mañá unha xunta de seguridade para establecer as actuacións que se levarán a cabo ese mesmo día, facendo fincapé nos colexios electorais que mudan nestes comicios.

O cambio máis significativo prodúcese nas mesas electorais do centro de Boiro e de Cabo de Cruz. Deste xeito, as que antes estaban situadas na Casa da Cultura e o Centro Social de Boiro, trasládanse todas ao pavillón de A Cachada. Así mesmo, as mesas de Cabo de Cruz, que ata o de agora estaban repartidas entre a Casa do Mar e o CEIP Santa María do Castro, pasarán a agruparse na súa totalidade no Centro Social de Cabo de Cruz.

Desde o Concello manifestan que estes cambios veñen motivados pola mellora de accesibilidade aos colexios electorais, así como a optimización de recursos, tanto materiais coma humanos. Ademais, co obxectivo de comunicar esta medida, acordouse a elaboración dun bando informativo e tamén duns carteis que se colocarán nos lugares máis significativos.

En canto á zona de aparcamento dispoñible diante da Piscina Municipal e detrás do Centro Social  de Cabo de Cruz, establecerase un límite de 20 minutos entre as 09.00 e as 20:00 horas, co propósito de garantir a rotación dos vehículos. Da mesma maneira, as persoas con mobilidade reducida poderán estacionar na mesma porta das instalacións da Piscina Municipal para ir a votar. A veciñanza pode consultar o colexio electoral no que lle corresponde votar a través das Oficinas Xerais do Concello de Boiro, podendo chamar ao Consistorio na propia xornada das eleccións para resolver calquera dúbida.