A Sociedade de Infraestruturas e Equipamentos Penitenciarios e da Seguridade do Estado (SIEP) vén de adxudicar a construción da comisaría de Ribeira a Obras y Servicios Gómez Crespo, S.L. O importe da adxudicación ascende a 2.592.519 euros e o prazo de execución das obras é de dezaoito meses. No momento de saír a licitación, o valor do contrato estimábase en 3.180.614’73 euros.
Esta actuación foi aprobada nunha sesión do Consello de Ministros celebrada a finais de xaneiro, enmarcándose no Plan de Infraestruturas para a Seguridade do Estado 2019-2025.
A construción do novo edificio de Ribeira está pendente desde o ano 2009, cando a Dirección Xeral de Policía solicitou a licencia de obra ao Concello, pero a crise económica obrigou a retrasar a actuación. Finalmente, en xuño deste ano anunciouse o seu impulso de cara a súa materialización.
A zona escolleita para esta nova instalación é a de Fontán, onde se atopan os terreos sobre os que se erixirá esta infraestrutura e que foron cedidos polo Concello. Trátase dunha parcela que conta con 2.074 metros cadrados.
A actual sede policial atópase na avenida Miguel Rodríguez Bautista, ao lado do CEIP O Grupo, nun edificio que foi cedido pola Xunta de Galicia na década de 1980 e sometido a reformas co obxectivo de habilitalo para acoller os servizos que presta á cidadanía aínda a día de hoxe.
