20191003. A xunta local da Asociación Española Contra o Cancro (AECC) da Pobra do Caramiñal programa unha serie de actividades para o mes de outubro con motivo da conmemoración do Día Mundial do Cancro de Mama.
Así, o domingo 6, en horario de 11.00 a 14.00 horas, a praza de Maura acollerá unha mesa informativa sobre esta enfermidade. Tamén disporán de folletos explicativos, así como diverso material divulgativo correspondente a esta campaña coma, por exemplo, as gafas de sol da AECC, pulseiras e libretas.
Ademais, o venres 11 terá lugar, ás 21.30 horas, a III Cena Solidaria en favor da AECC no restaurante pobrense Torre de Xunqueiras. Do mesmo xeito que en edicións pasadas, celebrarase un sorteo de agasallos e haberá sesión DJ a cargo de Sounds DJ Matrek. As entradas están á venta en diversos locais da Pobra cun prezo establecido nos 40 euros, podendo adquirirse ata o 9 de outubro.
A organización expresa o seu agradecemento a tódalas empresas colaboradoras e anima á veciñanza pobrense a participar neste evento, agardando repetir o éxito de edicións anteriores.
