20191010 Os venres deste mes de outubro (e até xuño, mentres dure o período lectivo) a rapazada da Pobra ten unha cita co xogo, a diversión, o traballo cooperativo e a aprendizaxe. Estamos a falar da Pequetroula, que se celebra todos os venres, da man do Concello, no edificio da Praza de Abastos local, en horario de 17.00 e a 21 horas e a disposición da rapazada de idades comprendidas entre os 3 e os 12 anos.
O programa de actividades será tan amplo como poidamos imaxinar: haberá (este venres 11) obradoiros de fabricación de estoxos temáticos e de elaboración de abelorios, xogos con paracaídas, tatuaxes con purpurina, monicreques e contacontos, ao que cómpre engadir (o venres 18 de outubro) xogos de puntaría, talleres de música e coreografía ou contos con papiroflexia, entre outras cousas.
Por se isto fose pouco, o venres 25 celebrarase un obradoiro de Samaín (a festa do 1 de novembro), contos ás escuras, monicreques, maquillaxes de terror e xogos temáticos relacionados coa dita celebración.
Os xogos de Pequetroula teñen ademais o engadido extra de ser unha maneira divertida de contribuír ao comercio local, de aí que para participar no programa deste mes de outubro sexa preciso levar tickets de compra previamente obtidos nas tendas do termo municipal (tres euros equivalen a unha hora de actividades).
