20191011 A praza do Concello de Ribeira foi un clamor este xoves 10 contra a violencia machista, froito da mobilización convocada novamente polo grupo comarcal de Mulleres en Acción (Asociación de Mulleres da Barbanza) a raíz dos dous casos máis recentes de agresións perpetrados na cidade, os dous denunciados nesta última semana. A concentración comezou ás 20.00 horas ao berro de “basta xa a de violencia contra as mulleres!”.
O acto foi acompañado dun manifesto, lido ao remate do mesmo por Loli Millán, persoa achegada á familia da veciña de Ribeira (a vítima do segundo dos casos de violencia machista desta semana, o primeiro foi denunciado a fin de semana) que permanece hospitalizada con graves queimaduras por, presuntamente, a súa parella.
Segundo lembraron as integrantes de Mulleres en Acción, “o machismo mata, e tamén agride, despreza, insulta, invisibiliza, discrimina e fai imposible a convivencia que se lle debe esixir á democracia, por iso queremos denunciar e condenar a quen agride ás mulleres e as fai vivir con medo”.
Novamente o colectivo volveu esixir, entre outras cousas, que a loita contra o terrorismo machista sexa unha cuestión de Estado, que a loita e os recursos inclúan tanto a violencia que exerce a parella ou ex parella como as agresións de tipo sexual ou acoso sexual no ámbito laboral, e que todas as instancias do Goberno se comprometan realmente na prevención e erradicación das violencias machistas.