20191014 O proxecto para converter o faro de Corrubedo e a súa contorna nun complexo turístico recibiu estes días un novo e importante pulo: o visto bo da Autoridade Portuaria de Vilagarcía. Este respaldo, que chega logo dunha longa paréntese administrativa (a comprendida entre que se deron a coñecer os detalles miúdos da iniciativa, hai máis dun ano, e o remate das avaliacións por parte do consello de administración da Autoridade Portuaria de Vilagarcía), significa entre outras cousas que a entidade pública competente considera que a a actividade vindeira do faro como asistente en navegación está garantida polo proxecto para converter os edificios anexos nun hotel de catro estrelas (o inmóbel da sirena e a antiga casa do fareiro) e a torre de sinais principal nun restaurante e recepción. Como lembraremos, a firma titular da concesión é Rianxo Xestión de Empresas.
As orixes do proxecto
Construído en 1852 e proxectado por Celedonio de Uribe, o faro de Corrubedo avanza a día hoxe cara a unha nova andaina que complemente a súa aínda vixente faceta de recurso para a circulación marítima. Estamos a falar do proxecto para convertelo en restaurante (o faro) e hotel (a casa do fareiro e o edificio da sirena), que é o que vén de recibir o visto bo da Autoridade Portuaria.
O proxecto ten un investimento de 1.500.000 euros e a previsión, hai máis dun ano, era rematar nun treito avanzado de 2019, cousa que se adiará, con toda probabilidade, á recta final de 2020. A persoa encargada de sentar as bases desta nova andaina, que afectará aos cinco edificios do conxunto arquitectónico, é o empresario local Anxo Rodríguez, xerente dos cámpings Ría de Arousa. O seu proxecto inclúe o acondicionamento dun restaurante, un quiosco e un hotel cunha ducia de habitacións. A súa proposta tamén acubilla a posibilidade de habilitar un centro social noutro dos edificios anexos, de pequenas dimensións, e unha xeadería-cafetería noutra das construcións.
O proxecto para a posta en valor do faro e da súa contorna foi desenvolvido co estudo de arquitectura GOC, con sede na Coruña, que acompaña o plan de traballo cun marcado “carácter local” e un compromiso coa arquitectura e o mobiliario tradicional galego, neste caso a arquitectura e o mobiliario tradicional das construcións costeiras. Iso si, dándolle unha viraxe de reinterpretación e actualización (do que se trata é de reivindicar a tradición como “indicativo de calidad”).
Amais da vertente hostaleira, gastronómica e turística, os traballos a realizar contemplan tamén o acondicionamento da contorna, garantindo a accesibilidade nunha área de arredor de 20.000 metros cadrados e ligando uns edificios con outros a través de pasarelas de madeira. Por outra banda, brindaráselles aos visitantes (clientes ou non) a posibilidade de acceder ao interior do faro (que será tamén un pequeno museo) é a súa terraza. Nesta, o proxecto inclúe a posibilidade de ampliar o servizo de hostalería.
