20191008. A andaina solidaria a favor da Asociación Galega de familias de nenos Prematuros (AGAPREM) organizada pola Asociación de Amas de Casa de Ribeira, en colaboración co Concello, logrou recadar 1700 euros. A cita contou con 220 participantes que realizaron un itinerario de 8 quilómetros, aproximadamente, percorrendo diversos emprazamentos do municipio ribeirense. A presidenta do colectivo de Amas de Casa, Puri Cores, destacou a asistencia de Alejandro Muñuruzi, pediatra e neonatólogo do Complexo Hospitalario Universitario de Santiago (CHUS), e de Carmen Tuñas, representante do equipo de enfermaría de neonatoloxía do mesmo hospital.
Unha vez concluída a andaina, procedeuse á actuación das pandereteiras de Amas de Casa de Castiñeiras e Corrubedo, así como ao sorteo de regalos doados por comercios.
Puri Cores tamén quixo expresar o seu agradecemento, entre outros, ao Concello ribeirense, Policía Local, Protección Civil, establecementos do municipio, á xunta directiva das Amas de Casa, a tódolos participantes, e a Fran Romay por participar activamente na organización e preparar o itinerario.
Así mesmo, anunciou que este evento se repetirá o primeiro domingo de outubro dos vindeiros anos.
