Rianxo, por ser o concello que exerce a presidencia nos dous primeiros anos de existencia da Asociación de Entidades Locais pola Lingua Galega, acolleu este martes 29 a primeira asemblea xeral da dita asociación a prol da normalización do galego, fundada o pasado mes de febreiro en Santiago por 15 concellos da nosa terra. A xuntanza celebrouse no Auditorio de Rianxo, onde se volveu pór de manifesto a firme vontade de compartir recursos e xuntar forzas para desenvolver proxectos que incrementen a todos os niveis a presenza do galego.
Rianxo, que como dixemos exercerá a presidencia durante os dous primeiros anos, acolleu a representación política e técnica dos demais concellos que pertencen á asociación: A Baña, A Coruña, Ames, Ferrol, Moaña, Narón, O Grove, Ponteceso, Pontevedra, Ribadeo, Rois, Santiago de Compostela, Teo e Vilagarcía de Arousa. Esta primeira asemblea xeral serviu para aprobar a adhesión de dúas novas entidades socias: os concellos de Betanzos e Redondela, e, tamén, para determinar “cal vai ser o xeito de organizar o traballo da asociación”.
Segundo informou o Concello de Rianxo, as administracións locais que forman parte da asociación xa viñan colaborando xuntas en proxectos de promoción da lingua, como son os casos do Apego (primeira infancia), o certame Youtubeir@s (tecnoloxías e comunicación) ou o Club de Debate (mocidade). O obxectivo da asociación é “promover a colaboración entre as distintas institucións para lograr unha xestión máis eficaz e unha redución considerable nos custos destes e doutros proxectos en materia de lingua, co fin de que poidan estenderse ao conxunto da cidadanía galega”.
