20190923 Este domingo 22 xuntáronse no monte de Boiro algúns dos principais deportistas de trail (carreira en sendeiros de montaña) da nosa terra e de máis alá da nosa xeografía. A sexta edición do Trail Castelo de Vitres foi unha cita heroica na que as/os participantes puxeron a proba o seu potencial físico e mental e, tamén, a súa ampla capacidade para confraternizar ante os desafíos deportivos (o Facebook da proba, chea de demostracións de amizade, admiración e compañeirismo, así o reflicte).
A proba contou dúas distancias: a tradicional de 26 quilómetros e unha máis accesíbel, de 15, con 700 metros positivos, para impulsar a participación das e dos deportistas acabados de iniciárense neste deporte. Os dous traxectos tiveron o seu punto de partida no polideportivo de Santa Baia, arredor das 9.30 horas (a proba principal) e das 10.00 (a proba para os iniciados). Os premios, que se entregaron sobre as 14.30 horas, puxeron de manifesto a importante valía e capacidade de superación de todas as persoas inscritas: non só houbo trofeos para os que subiron ao podio, senón que tamén se entregaron recoñecementos entre todos os corredores con independencia de cal fose finalmente o seu resultado, amais de medallas conmemorativas.
A carreira, organizada polo Club Tribu Trail coa colaboración activa do Concello de Boiro, tamén destacou polas circunstancias do clima de finais de setembro (unha sucesión de chuvieiras e sol que, lonxe de deslucir a competición, mellorou o pano de fondo da mesma) e pola paisaxe pola que discorreron os dous itinerarios (o ascenso pola serra do Barbanza até o castelo de Vitres, un miradoiro de primeira categoría para contemplar a ría de Arousa ao completo).
Na proba participaron finalmente 200 corredoras e corredores.
A clasificación quedou da seguinte maneira:
· O palmarés da proba longa (neste PDF) encabezárono Elpido Gómez Sousa (2.37.07), Samuel Saborido Soñora (2.38.46), Emilio Montilla Fernández (2.38.46), Marcos Trelles Rodríguez (2.39.31) e Marcos Pascual Fidalgo (2.51.08).
· O palmarés da proba curta (neste PDF ao completo) quedou así: Esteban Toucedo Santos (1.20.24), Bruno Cardamas Freire (1.20.58), Chema Quintián Agrafojo (1.22.22), Adrián Fernández Domínguez (1.23.49) e Marcos Schneider (1.24.27).
